రష్యా చమురు కొనుగోళ్లపై అమెరికా తాత్కాలిక సడలింపు పొడిగింపు

ప్రపంచ ఇంధన మార్కెట్లలో అనిశ్చితి నెలకొన్న నేపథ్యంలో, రష్యా నుంచి చమురు కొనుగోళ్లపై గతంలో ఇచ్చిన ఆంక్షల సడలింపును అమెరికా మరోసారి పొడిగించింది. ఈ నిర్ణయంతో, ఇప్పటికే నౌకల్లో లోడ్ చేసిన రష్యా చమురును అన్ని దేశాలు కొనుగోలు చేసేందుకు తాత్కాలిక అనుమతి కల్పించబడింది.

అమెరికా ఆర్థికశాఖ విడుదల చేసిన ప్రకటన ప్రకారం, ఈ నెల 17 తేదీ లేదా అంతకంటే ముందే నౌకల్లో లోడ్ చేసిన చమురును మాత్రమే కొనుగోలు చేయవచ్చని స్పష్టం చేసింది. ఈ సడలింపు వచ్చే నెల 16 వరకు అమల్లో ఉంటుందని తెలిపింది.

అయితే, ఈ లైసెన్స్ కింద ఇరాన్, ఉత్తర కొరియా, క్యూబాకు చెందిన వ్యక్తులు, సంస్థలు లేదా జాయింట్ వెంచర్లతో ఎలాంటి లావాదేవీలు నిర్వహించేందుకు అనుమతి లేదని అమెరికా స్పష్టం చేసింది.

ఇటీవల అమెరికా ఈ సడలింపును ఇకపై పొడిగించబోదని ప్రకటించినప్పటికీ, తాజా పరిణామాల నేపథ్యంలో తన నిర్ణయాన్ని మార్చుకోవడం గమనార్హం.

అమెరికా-ఇరాన్ మధ్య ఉద్రిక్తతలు, యుద్ధ వాతావరణం వంటి కారణాలతో ప్రపంచవ్యాప్తంగా చమురు ధరలు పెరుగుతున్నాయి. ఈ క్లిష్ట సమయంలో, ముందుగా ఇచ్చిన సడలింపుల వల్ల దాదాపు 140 మిలియన్ బ్యారెళ్ల రష్యా చమురు ఇప్పటికే ప్రపంచ మార్కెట్లకు చేరేందుకు అవకాశం లభించింది.

ఈ నిర్ణయం ప్రపంచ ఇంధన సరఫరాపై కొంత స్థిరత్వాన్ని తీసుకురావడంలో సహాయపడుతుందని విశ్లేషకులు అభిప్రాయపడుతున్నారు.